இதுகாறும் இல்லா நிலை,பரிதாபத்தில் ஊரகவளர்ச்சி துறை – ஒற்றர் ஓலை

என்ன ஒற்றரே…தாங்கள் வந்து நீண்ட நாட்கள் ஆகிறதே…

ஆமாம் தலைவா…ஊரக வளர்ச்சித்துறையை பற்றி நமக்கு கிடைத்த தகவல் கவலை தரக்கூடியதாக இருக்கிறது.

என்ன செய்தி ஒற்றரே….

உதவி இயக்குநரில் ஆரம்பித்து கூடுதல் இயக்குநர் வரை பல பதவிகள் பற்பல நாட்களாக காலியாக உள்ளது.கடந்த ஆட்சியின் காலகட்டத்தில் ஒருவர் ஓய்வுபெறும் நாளுக்கு முதல்நாளே காலியாக போகும் பதவிக்கான புதிய ஆணை வந்துவிடும்.ஆனா…

என்ன ஒற்றரே…என்ன தான் ஆச்சு ஊரக வளர்ச்சி துறைக்கு.

பலநாட்களாக காலியாக உள்ள பணியிடங்கள் நிரப்பப்படாமலே உள்ளதால் ஊரக வளர்ச்சித்துறையின் செயல்பாடுகளில் சுணக்கம் ஏற்பட்டு உள்ளது.

எங்கு கோப்பு தேங்குகிறது ஒற்றரே..

என்ன சொல்வது தலைவா…அமைச்சர் முதல் அதிகாரிகள் வரை அனைவரும் அசமந்தமாகவே உள்ளனர். மக்களின் நேரடி தொடர்பு உள்ள ஊரக வளர்ச்சித்துறை செயல்பாடு ஆளும்கட்சிக்கு ஆபத்தை உருவாக்கிவிடும் என்ற சிந்தனையே ஆளும் கட்சியினருக்கு தெரியவில்லை தலைவா…

முதல் ஐந்தாண்டுகளும் பயிற்சி காலமாக இருக்குமா ஒற்றரே..

மிக சரியாக சொன்னீர் தலைவா…அடுத்த ஐந்தாண்டுகள் இவர்களே ஆளும்கட்சியாக வந்தாலும் இந்த நிலை மாறாது போல தலைவா…துறையை பற்றி அனைத்து விவரங்களையும் துறை அமைச்சர் அறிந்து கொள்வதற்கே பத்தாண்டுகள் கடந்துவிடும் போல…

அடப்பாவமே…ஊரக வளர்ச்சி துறையை அவசர பிரிவில் இருந்து காப்பாற்ற முதல்வர் தலையிட வேண்டும்போல ஒற்றரே…

அதிசயம் ஏதாவது நடந்தால் மட்டுமே ஊரக வளர்ச்சித்துறை கரை சேரும் என ஆதங்கத்தை கொட்டிவிட்டு மறைந்தார் ஒற்றர்.