என்ன ஒற்றரே, அதிர்ச்சிகரமான செய்தியோடு ஆரம்பிக்கிறீர்…
ஆமாம் தலைவா…ஊரக வளர்ச்சி துறை செயலாளரை விட அந்த துறையில் கூடுதல் இயக்குநராக உள்ள மேற்கு மண்டலத்தை சேர்ந்த ஒருவர் அதிகாரமிக்கவராக உள்ளாராம். ஆணையர் கூட அவர் சொல்வதை தட்டுவதே இல்லையாம்..
ஆளும் தலைமைக்கு அவ்வளவு நெருக்கமா ஒற்றரே…
தேசத்தின் தலைநகரில் அவருடன் படித்தவர்கள் இஆப அதிகாரிகளாக உள்ளனர்களாம். அவர்களில் ஒருவர் தான் தமிழக அரசின் உச்ச அதிகாரியாக வர உள்ளாராம். அவர்களின் ஆதரவு பூரணமாக தனக்கு உள்ளதாக கூறியே தான் நினைத்ததை சாதித்து விடுவாராம் தலைவா..
அப்படியெனில். அவர் சொன்னதை நடந்துதானே தீரும் ஒற்றரே…
தலைவா…ஊரக வளர்ச்சிதுறையில் சமீபத்தில் கூடுதல் இயக்குநர்களாக சில பேருக்கு பதவி உயர்வு ஆணை வந்தது. அவர்களுக்கான பொறுப்பு ஒதுக்குவதிலும் தனது சமுதாயத்தை சேர்ந்தவரிடம் தான் முக்கிய பொறுப்பினை ஒதுக்கி தந்துள்ளாராம்.
சாமியாருக்கும் சமுதாய பற்று இருக்கும் தானே ஒற்றரே…
தவறில்லை தலைவா…ஆனா, பிற சமூக அதிகாரிகள் இவரால் தொடர்ந்து புறக்கணிக்கப்பட்டு வருகின்றனராம். இந்த பிரச்சனை நீருபூத்த நெருப்பாக அந்த துறைக்குள் உள்ளதாம். விரைவில் வெடிக்கும் என்கின்றனர்.
இதற்கு என்ன தான் தீர்வு ஒற்றரே…
சம்மந்தப்பட்ட அதிகாரியை பவர் இல்லா பொறுப்பிற்கு இடமாற்றம் செய்தால் மட்டுமே பிரச்சனை முடிவுக்கு வரும் என்கின்றனர்.செயலாளரின் அதிகாரம் இவரிடம் என்ன ஆகப்போகிறது என்பதை அறிந்து வருகிறேன் தலைவா என கூறிவிட்டு மறைந்தார் ஒற்றர்.
























