வேட்டிய மடிச்சுக்கட்டிடா? மீண்டும் ஈபிஎஸ்-ஐ சீண்டுகிறாரா ஓபிஎஸ்?

சட்டமன்ற தேர்தல் தேதி அறிவிக்கப்பட்டுள்ள நிலையில், துணை முதல்வர் ஓபிஎஸ்ஸின் இரண்டு பக்க விளம்பரம் பேசுபொருளாக மாறியிருக்கிறது.

தமிழக சட்டமன்ற தேர்தல் 2021 வரும் ஏப்ரல் 6ஆம் தேதியும், வாக்கு எண்ணிக்கை மே 2ஆம் தேதியும் நடைபெறவுள்ளது. திராவிடக் கட்சிகளின் இருபெரும் ஆளுமைகளான கருணாநிதி, ஜெயலலிதா இல்லாத முதல் சட்டமன்ற தேர்தல் இதுவாகும். இதனால் வரும் தேர்தல் மிகுந்த எதிர்பார்ப்பை ஏற்படுத்தியுள்ளது. கூட்டணிக் கணக்குகள், தொகுதி பங்கீடு, வேட்பாளர்கள் தேர்வு உள்ளிட்டவற்றில் அனைத்து கட்சிகளும் தீவிரம் காட்டி வருகின்றன.

ஆளும் அதிமுகவை பொறுத்தவரை சசிகலா வருகையால் சலசலப்பு நீடித்து வருகிறது. அவரை கட்சியில் சேர்த்து கொள்ள மாட்டோம் என்று முதல்வர் எடப்பாடி பழனிசாமி திட்டவட்டமாக தெரிவித்துவிட்டார். ஆனால் துணை முதல்வர் ஓ.பன்னீர்செல்வமோ சசிகலா விஷயத்தில் மவுனம் காத்து வருகிறார். இவர் கடைசி நேரத்தில் அணி மாறிவிடுவாரோ என்றெல்லாம் அரசியல் விமர்சகர்கள் யூகங்களை முன்வைத்துள்ளனர்.

இதற்கிடையில் முதல்வருக்கு போட்டியாக துணை முதல்வரும் அரசின் சாதனைகள் குறித்த விளம்பரங்களை வெளியிட்டு வருகிறார். அதிலும் தான் முதல்வராக இருந்த போதும், தனது அமைச்சரவையின் கீழ் செய்த சாதனைகளை மேற்கோள் காட்டி விளம்பரம் செய்தது பேசுபொருளானது. இது கட்சிக்குள் முதல்வர், துணை முதல்வர் இடையிலான உரசலை வெளிச்சம் போட்டுக் காட்டியது. அதிலும் ’விசுவாசத்தில் நிகழ்கால பரதன்’, ‘புதிய வரலாற்றை படைத்துக் காட்டியவர் அன்பு சகோதரர் ஓ.பன்னீர்செல்வம்’ என்று தினசரி நாளேடு ஒன்றில் செய்த விளம்பரம் பரபரப்பாக பேசப்பட்டது.

Also Read  சின்னதிரையையும் விட்டுவைக்காத சமந்தா

அதாவது ராமர் வனவாசம் சென்ற போது பரதனிடம் ஒப்படைக்கப்பட்ட ஆட்சி, அதிகாரம் மீண்டும் ராமரிடமே ஒப்படைக்கப்பட்டதை சுட்டிக் காட்டி ஓ.பன்னீர்செல்வத்தை ஜெயலலிதா புகழ்ந்ததாக குறிப்பிடப்பட்டுள்ளது. இது சசிகலா விடுதலையாகி வெளிவந்த உடன் அவரிடம் ஆட்சி, அதிகாரத்தை எடப்பாடி பழனிசாமி ஒப்படைக்க வேண்டும் என்பதை உணர்த்துகிறாரோ என்று கேள்விகள் எழுந்தன.

இதுதொடர்பாக பேசிய டிடிவி தினகரன், ஓபிஎஸ் மன கஷ்டத்தில் இருப்பதாக தான் என் உள்ளுணர்வுக்கு தோன்றுகிறது. சின்னம்மாவிற்கு ஆதரவு நிலைப்பாட்டை ஓபிஎஸ் அளித்தால் நிச்சயம் வரவேற்போம். பரதன் ஆகிவிட்டார் என்று நினைத்துக் கொள்வேன் என்றார். எனவே அதிமுக – அமமுக இணைப்பு ஓ.பன்னீர்செல்வம் வழியாக சாத்தியமாகக் கூடும் என்றெல்லாம் அரசியல் கணக்குகளை சிலர் முன்வைத்துள்ளனர்.

இந்நிலையில் துணை முதல்வர் ஓ.பன்னீர்செல்வம் தினசரி நாளேடு ஒன்றில் இரண்டு பக்க விளம்பரத்தை இன்று வெளியிட்டுள்ளார். அதில், ’உழைப்பால் உயர்ந்தவர். இயக்கத்தில் உண்மையாக உழைத்தால், இயக்கத்தின் மீதும் தலைமை மீதும் பற்று கொண்டு விசுவாசமாக இருந்தால் வளர்ச்சி என்பதை யாராலும் தடுக்க முடியாது. தவிர்க்க முடியாது என்று ஜெயலலிதா கூறியதாக தலைப்பிடப்பட்டுள்ளது.

இதன்மூலம் சசிகலா வழியாக முதல்வர் பதவியை எடப்பாடி பழனிசாமி பெற்றுக் கொண்டதை ஓ.பன்னீர்செல்வம் குத்திக் காட்டுகிறாரா என்று சமூக வலைதளங்களில் விமர்சிக்கத் தொடங்கியுள்ளனர். பின்னர் இளமைப் பருவம் முதல் துணை முதல்வர் ஆனது வரை அவருடைய நீண்ட பயணத்தின் விவரங்கள் இடம்பெற்றுள்ளன.

Also Read  அதிமுக தொகுதி பங்கீடு - பின்வாங்கிய தமிழக பாஜக

கடைசியாக 45 ஆண்டுகள் இயக்கத்திற்காக, 26 ஆண்டுகள் அரசு சார்ந்த பணிகளையும் செய்துள்ளதாக கூறப்பட்டுள்ளது. இந்த சாதனைப் பட்டியலை பார்த்தால் முதல்வர் பழனிசாமியை விட கட்சிக்காகவும், ஆட்சிக்காகவும் நான் தான் அதிகம் செய்திருக்கிறேன் என்று ஓபிஎஸ் சொல்லாமல் சொல்கிறாரா என்கின்றனர் அரசியல் விவரம் தெரிந்தவர்கள்.